Lazarus хакерын бүлэглэл хортой код тараахад Windows шинэчлэлтийг идэвхтэй ашиглаж байна. Үүнийг Malwarebytes Threat Intelligence багийн шинжээчид АНУ-ын аюулгүй байдал, сансар судлалын Lockheed Martin компанийг нэрийн өмнөөс имэйл илгээсэн фишинг халдлагад шинжилгээ хийх явцдаа олж илрүүлжээ.
Уг бүлэглэл нь Хойд Солонгосын Засгийн газрын дэмжлэгтэй цэргийн хакерын бүлэглэл бөгөөд 2009 оноос хойш арав гаруй жил үйл ажиллагаагаа явуулж байгаа бөгөөд 2017 оны WannaCry ransomware кампанит ажил, Sony Films зэрэг томоохон компаниуд болон дэлхий даяар олон банкуудын эсрэг халдлага үйлдэж байсан. Мөн арав гаруй орны батлан хамгаалах салбарын эсрэг томоохон хэмжээний кибер тагнуулын кампанит ажилд ThreatNeedle цоорхойг ашиглаж байжээ.
Судлаачид дэд бүтцийн зохион байгуулалт, баримт бичгийн өгөгдөл, өмнөх кампанит ажилтай төстэй зорилтот байдал зэрэг хэд хэдэн нотолгоонд үндэслэн энэхүү халдлагыг Lazarus бүлэглэлтэй холбон дүгнэсэн.
Хохирогчид хортой хавсралтуудыг нээж WindowsUpdateConf.lnk файлыг ажиллуулахад wuaueng.dll файлыг Windows/System32 далд хавтсанд хуулан, wuauclt.exe ажиллаж хортой DLL-ийг ачаалах командыг өгнө.
Зураг 1. Халдлагын процесс
Энэхүү тактикийг ИБУИНВУ-ын аюулгүй байдлын MDSec компанийн судлаач David Middlehurs 2020 оны 10 дугаар сард олж илрүүлснээр халдагчид Windows Update-ийг ашиглан Windows 10 систем дээр хортой кодыг тарааж болохыг олж мэдсэн.
АНУ-ын халдлага, эмзэг байдлын бүртгэлийн сан болох MITRE ATT&CK корпорац нь энэ төрлийн хамгаалалтаас зайлсхийх аргыг Signed Binary Proxy Execution гэж ангилдаг бөгөөд энэ нь халдагчдад хамгаалалтын программ хангамж, хяналт, баталгаажуулалтыг тойрч гарах боломжийг олгодог. Энэ тохиолдолд халдагчид ачаалагдсан Windows Update-ийн баталгаажсан хоёртын файлыг ашиглан өмнө нь устгасан хортой код бүхий DLL-ийг сэргээж ажиллуулдаг байна.
АНУ-ын Сангийн яам 2019 оны 9 дүгээр сард БНАСАУ-ын ивээн тэтгэдэг Lazarus, Bluenoroff, Andariel гэсэн хакерын гурван бүлэгт хориг тавьсан бөгөөд АНУ-ын засгийн газар Lazarus-ын үйл ажиллагааны талаарх мэдээлэлд 5 сая доллар хүртэл урамшуулал олгохоор болжээ.
Эх сурвалж: https://www.bleepingcomputer.com/
